पाेखरा, असार,१९ गते। पोखराको छोरेपाटनबाट काठमाडौंसम्म अब अत्याधुनिक सुविधा सम्पन्न लग्जरी बस सेवा सुरु भएको छ। इन्टरसिटी एडभेन्चर ट्राभल्स एण्ड टूर प्रा.लिले काठमाडौं–पोखरा रुटमा सुरु गरेको यस बस सेवाले गुणस्तरीय, आरामदायी र प्रविधिमैत्री यात्रा अनुभव दिने दाबी गरेको छ।
पृथ्वी राजमार्ग बस व्यवसाय समितिका अध्यक्ष योगेन्द्र केसीले बसको रिबन काटेर उद्घाटन गर्दै व्यवसायीहरू समयसापेक्ष सेवामा नयाँ लगानी र नवप्रवर्तनमा जुटेको बताए। उनले भने, “समयको मागअनुसार प्रविधिसँगै सेवामा सुधार नगर्ने हो भने व्यवसाय पछि पर्न सक्छ।” केसीका अनुसार निकट भविष्यमा मिनिबारसहितका थप प्रविधियुक्त गाडी सञ्चालनको तयारी पनि भइरहेको छ।
४ करोड रुपैयाँको संयुक्त लगानीमा काशीराम न्यौपाने र अमित बहादुर भण्डारी ‘माइला’ले उक्त सेवा सुरु गरेका हुन्। हालका लागि इन्टरसिटीले चारवटा पर्यटक लक्षित लग्जरी बसमार्फत दैनिक काठमाडौं–पोखरा र पोखरा–काठमाडौं सेवा प्रदान गर्नेछ। छोरेपाटनमा काउण्टर रहेको यस कम्पनीको लक्ष्य पर्यटक र स्थानीय यात्रु दुवैका लागि सुरक्षित र व्यवस्थित सेवा सुनिश्चित गर्नु हो।
सञ्चालक न्यौपानेका अनुसार, प्रत्येक बसमा वाइफाइ, आरामदायी सिट, सीसीटीभी सुरक्षा र दक्ष चालकको व्यवस्था गरिएको छ। “नियमित मर्मतसम्भार र समयमै सेवा सुरुवातमा हाम्रो विशेष ध्यान छ,” उनले बताए।
नयाँ सुविधासहितको इन्टरसिटी बस सेवा पोखरा–काठमाडौं यात्रुहरूका लागि अबको यात्रालाई झन् सहज, सुरक्षित र आरामदायी बनाउने आशा गरिएको छ।
प्रतिक्रिया दिनुहोस्